Erich Menved, König der Dänen, ertheilt dem Helmold Lode sicheres Geleit zum Königlichen Hoflager, so wie zur Rückreise, den 15. April 1296.

Ericus, Dei gratia Danorum Sclavorumque rex, omnibus, praesens scriptum cernentibus, salutem in Domino sempiternam. Noveritis, quod nos exhibitori praesentium, domino Helmoldo de Lode, et suis sequacibus omnibus plenam concedimus securitatem et securum conductum, ad nos veniendi, apud nos morandi et iterum ad propria redeundi, ab hinc usque ad festum b. Michaelis proximum, pro nobis, fratre nostro, nostris omnibus, et aliis, volentibus aliquid facere vel omittere causa nostri. In cuius rei testimonium sigillum nostrum praesentibus duximus apponendum. Datum Alaeburg, anno Dom. MCCXCVI, in Dominica, qua cantatur Iubilate, praesentibus consiliariis nostris.